Sihkkarastit ahte luondduresurssat galget searvevuhtii boahtit ávkin

Bargiidbellodaga sámediggejoavku parlamentáralaš jođiheaddji, Ronny Wilhelmsen, lea duhtavaš Alimusrievtti duomuin gaskal Unjárgga gilisearvvi ja Finnmárkkuopmodaga (FeFo).

Ovttajienalaš Alimusriekti attii bearjadaga Finnmárkkuopmodahkii guorrasii ahte Finnmárkkuopmodagas lea riekti hálddašit meahcceresurssaid Unjárggas Finnmárkkus, ja ahte báikkiolbmuin leat geavahanvuoigatvuođat guhkesáiggi geavaheami vuođul.

Wilhelmsen oaivvilda duomu eavttut ja loahppaboađus addá rievttes gova das mot meahcceresurssaid hálddašeapmi berre leat Finnmárkkus.

- Vaikko Unjárgii ii mieđihuvvon riekti hálddašit iežas guovlluid, de duomus leat báikkiolbmuide nannejuvvon sin geavahanvuoigatvuođat iešheanalis vuođu alde. Dáid geavahannjuolggadusaid galgá FeFo hálddašit, ja áiggi vuollái boahtá dat nannet FeFo orgánan mii galgá hálddašit min oktasaš resurssaid ceavzilis lági mielde, ja sihkkarastit sámi vuoigatvuođaid Finnmárkolága bokte, dadjá Wilhelmsen.

Son oaivvilda Alimusrievtti boađus maid sádde dehálaš signála. FeFo ferte farggamusat álggahit gulahallama báikkiolbmuiguin guovllus ja ráhkadit njuolggadusaid mat doahttalit gártaduvvon geavahanvuoigatvuođaid. Mii áigut ávžžuhit sihke FeFo ja vuoigatvuođalaččaid gulahallat konstruktiivvalaččat ja bures dán barggu oktavuođas.

plenum høst 2017