FeFo ferte váldit eret lihttoláigohandivvaga

Mii oaivvildat ahte FeFo ferte váldit eret lihttoláigohandivvaga servviin ja joavkkuiguin geat barget aktiivvalaččat ruoššaluossainvašuvnna vuosttá. Oktiibuot hálddašit FeFo ja lihttoláigolaččat badjel 50 jogaid Finnmárkkus ja lea meroštallojuvvon ahte 2023:s lassána ruoššaluossa mearkkašahtti ollu. FeFos lea spiehkastandáhpáhusa vuođul vejolašvuohta váldit eret lihttoláigohandivvaga jfr čuokkis 3.1 Finnmárkkuopmodaga njuolggadusat mat gusket čázádat geavahusvuoigatvuođaide.Ruoššaluossainvašuvdna lea dakkár spiehkastandáhpáhus, FeFo gii lea eanaeaiggát berre bargat visot maid sáhttá veahkehit joavkkuid ja servviid vuostálastit dán sávakeahtes nálli vuosttá. Dánne ferte FeFo dasa lassin earetgo čuovvut iežaset strategiija ruoššaluosa vuosttá, heaitit váldimis bálvalusmávssu lihttoláigolaččaiguin geat aktiivvalaš árjjalašvuođain barget ruoššaluosa vuosttá.Jus leat hástalusat heaittihit lihttoláigohandivvaga, de ferte FeFo geahččalit geavahit muhttin oasi sin badjebázahusas oaččut unnut dán ekologalaš katastrofa mii lea jođus. FeFos lea leamašan daid maŋemus jagiid jahkásaš bázahusruhta gaskal 4 ja 8 miljovnna.Mii ipmirdat ahte lea vuosttažettiin stáhtalaš ovddasvástádus hehttet dán eahpesávahahtti nálli lássaneame min čázádagain, muhto buot guoskevaš oasálastit fertejit veahkkin dán duođalaš dilis. Mii bivdit Sámediggeráđi farggamusat ráđđádallat FeFoin juolludan doaimmaid birra ruoššaluosa vuosttá.