Bargiidbellodat doalaha dievasčoahkkin-jođiheaddji

Bargiidbellodat lea soahpan válgateknihkalaš šiehtadusa eanetlogu bellodagaiguin Sámedikkis (NSR, GB ja JSL), mas Bargiidbellodat ain oažžu dievasčoahkkinjođiheaddji, ja lávdegoddejođiheaddji Bajásšaddan-, fuolahus- ja oahpahuslávdegottis.

Bargiidbellodaga parlamentáralaš jođiheaddji Ronny Wilhelmsen gal lea duhtavaš šiehtadallamiiguin.

-Mis leat leamaš buorit ságastallamat eanetlogu bellodagaiguin dán áššis, ja mii leat soahpan válgateknihkalaš ovttasbarggu, mii sihkkarastá midjiide buriid posišuvnnaid eatge dárbbaš politihkalaččat čatnasit eanetlohkui, dadjá Wilhelmsen.

Viidáset dadjá Wilhelmsen ahte lei lunddolaš Bargiidbellodahkii ohcat válgateknihkalaš ovttasbarggu go válgaboađus čielggai. 

-Lea min DNA:s ohcat fámu doppe gos mii sáhttit. Ná mii oažžut doarjaga min politihkkii guhkes áigái. Seammás lea midjiide dehálaš váikkuhit čorgatvuhtii ja buori čoahkkinjođiheapmái min álbmotválljejuvvon parlameanttas, joatká Wilhelmsen.

Bargiidbellodat áigu evttohit ahte Tom Sottinen (Nuorta válgabiire) joatká dievasčoahkkinjođiheaddjin boahtte áigodagas. Sottinen válljejuvvui dievasčoahkkinjođiheaddjin 2018 geassemánus ja čohkká formálalaččat dievasčoahkkinjođiheaddjin Duorastahkii dán vahkus, go dalle čađahuvvo ođđaválljen.

-Mun giittán hui ollu luohttámuša ovddas. Ja áiggun bargan mu buoremusa ovddidit Sámedikki dáhtu ja doaimma boahtte áigodagas. Lea gelddolaš sáhttit joatkit barggu mainna álggiimet ovddit áigodagas, earret eará Sámedikki čoahkkinortnega ođastemiin, ja fuolahit vuđolaš guorahallama válgačađaheamis. Mun illudan dáinna bargat, dadjá Sottinen loahpas. 

Bargiidbellodat oažžu maiddái Bajásšaddan- fuolahus ja oahpahuslávdegotti lávdegoddejođiheaddji. Dás evttohuvvo Ann-Britt Eira Sara. Son lea ođđa sámediggeáirras Ávjovári válgabiirres, muhto son oaivvilda su bargoeallinvásáhus šaddá buorre ávkin fágalávdegottis.

- Mus lea mánáidsuodjaluspedagoga oahppu, ja lean bargan dearvvašvuođasuorggis 17 jagi. Muhto dál áiggun ovddas guvlui bargat vuoktačuohppin, gos beaivválaččat deaivá ollu olbmot ja son oažžu ollu buriid ságastallamiid servodatgažaldagaid birra. Nu ahte mun illudan hui ládje bargagoahtit dáinna lávdegotti jođiheaddjedoaimmain.